Ander gebeurtenisse en kenmerke:

• Beroep: 1954, Suid-Afrika; Tweede Luitenant
• Beroep: 1956, Suid-Afrika; Luitenant
• Beroep: 1959, Suid-Afrika; Kaptein
• Beroep: 1961, Suid-Afrika; Majoor
• Beroep: 1965, Suid-Afrika; Kommandant
• Beroep: 1968, Suid-Afrika; Kolonel
• Beroep: 1971, Suid-Afrika; Brigadier
• Beroep: 1974, Suid-Afrika; Generaal-majoor
• Beroep: 1976, Suid-Afrika; Luitenant-generaal
• Beroep: 1977, Suid-Afrika; Hoof van die Suid-Afrikaanse Leër
• Beroep: 1980, Suid-Afrika; Generaal
• Beroep: 1980, Suid-Afrika; Hoof van die Suid-Afrikaanse Weermag

Notas:

"Laaste van die boeregeneraals"

Genl. Constand Viljoen, SSA, SD, SOE, SM, MMM is op 3 April 2020 in die ouderdom van 86 op sy plaas in die Distrik Ohrighstad oorlede. Voor sy aftrede in 1985 was hy Hoof van die Suid-Afrikaanse Weermag na 'n roemryke loopbaan wat vanaf 1954 gestrek het. Hy was 'n uitmuntende soldaat en geliefd deur sy soldate.

Constand Laubscher Viljoen was die jongste van tweelingbroers wat op 28 Oktober 1933 te Standerton gebore is. Hy en sy ouer broer Abraham Carel Viljoen was die seuns van Andries Viljoen en Geesie Maria Kotze. Sy vader sterf op 8 November 1947 toe Constand nog net 14 jaar oud was.

Hy het sy skoolopleiding aan die Laerskool Perdekop en Hoërskool Standerton ontvang en matrikuleer in 1951. Na hoërskool, het hy aan die Universiteit van Pretoria gaan studeer waar hy in 1956 die graad B.Sc (B. Mil) ontvang.

Gedurende sy militêre loopbaan het hy die volgende dekorasies ontvang:
SSA - Orde van die Ster van Suid-Afrika (Militêr): Goud
SD - Suiderkruis-dekorasie
SOE - Suid-Afrikaanse Polisie Ster vir Uitmuntende Diens
SM - Suiderkruismedalje
MMM - Militêre Merietemedalje

Na sy aftrede het hy gaan boer op sy plaas te Ohrigstad, wat hy op die ouderdom van 23 gekoop het. In 1993, gedurende die politieke oorgang in Suid-Afrika, tree Viljoen tot die politiek toe saam met nog drie ander oud-generaals en help met die stigting van die Afrikaner Volksfront.

Kórt voor die Suid-Afrikaanse algemene verkiesing van 1994 stig Viljoen die Vryheidsfront as politieke party vir die Afrikaners. In 2001 het hy die leierskap van die Vryheidsfront aan Pieter Mulder oorgedra en uit die politiek getree waarna hy hom voltyds op sy boerdery toegespits het.

Ten tyde van sy dood het hy reeds 2 jaar aan die siekte van Alzheimer gely.

Constand het getrou met Christina Susanna Heckroodt op 30 Nov 1957. Christina (dogter van Petrus Johannes Badenhorst Heckroodt en Hester Catharina Susanna Koekemoer) was gebore op 18 Sep 1935; was gedoop op 6 Des 1935 te Dutoitspan; is oorlede op 11 Feb 2021. [Groepsblad] [Family Chart]