Notas:

Naam:
Johannes Paassen is kort na sy ouers se huwelik en waarskynlik deur Ds. Lambertus Slicher, die leeraar van die gemeente Drakenstein in die periode, gedoop. Sy geboortedatum word nie in die doopinskrywing genoteer nie, maar ons kan aanneem dat dit tussen sy ouers se huwelik op 3 Augustus 1727 en sy doop op 21 September 1727 moes wees. Hy is vermoedelik vernoem na die doopgetuie Jan Moller, maar oor die herkoms van sy middelnaam is daar geen sekerheid nie. Die naaste verbintenis wat op die oorsprong van sy middelnaam kan dui is Margaretha Paasen, die eggenote van Abraham Lever. Abraham en Joachim het op 16 Oktober 1719 as onderskeidelik korporaal en soldaat in Kaap de Goede Hoop aangeland. Dit is moontlik dat hy en Joachim na hul aankoms kontak gehou het en Johannes daarom deels na Margaretha vernoem is. Ek kon egter geen bronne vind om 'n verbintenis tussen Joachim en Abraham na hul aankoms aan die Kaap te staaf nie. Johannes moes op 'n jong leeftyd gesterf het aangesien daar geen verdere verwysing na hom in primêre of sekondêre bronne voorkom buiten die aantekening van sy doop nie.

Gedoop:
Getuies by sy doop was Johannes Moller en Martha du Toit

Oorlede:
In die opgaaf van 1729 vir die periode 30 April 1728 tot 1 of 3 Mei 1729 word daar 1 seun aangegee vir Joachim en Anna Maria. In die daaropvolgende jaar 1730 word daar egter geen seun aangegee nie.